„ქართული ოცნების“ წევრი ელისო ჩაფიძე, სავარაუდოდ, თერჯოლა-ტყიბულის მაჟორიტარი დეპუტატობის კანდიდატი იქნება.
როგორც ჩაფიძემ დღეს გამართულ პრესკონფერენციაზე განაცხადა, აღნიშნულის შესახებ მას შეხვედრა ჰქონდა „ქართული ოცნების“ ერთ-ერთ ლიდერთან, რომლისგანაც შეთავაზება მიიღო.
„ქართული ოცნების“ ერთ-ერთმა ლიდერმა მითხრა, რომ თერჯოლა-ტყიბულის მაჟორიტარი დეპუტატობის კანდიდატად ერთ-ერთი პირველი სწორედ ჩემი კანდიდატურა განიხილება და იმ შემთხვევაში, თუ მე უარს ვიტყვი, სხვა კანდიდატურის განხილვა დაიწყება. უარის თქმის არანაირი საფუძველი არ მაქვს. მე გავეცი დაპირებები, ძალიან ბევრი მათგანი უკვე შესრულებულია, მაგრამ მათი ნაწილი კვლავ შესასრულებელია“, – განაცხადა ელისო ჩაფიძემ.
დეპუტატის თქმით, ტყიბულის მოსახლეობაც ფიქრობს, რომ ის კვლავ რაიონის წარმომადგენელი უნდა იყოს.
ჩაფიძის განმარტებით, ამ საკითხს „ქართული ოცნების“ ერთ-ერთ ლიდერთან, რომელთანაც საუბარი უკვე ჰქონდა, კვლავ დაუბრუნდება.
რაც შეეხება ”ქართული ოცნების” სიას, ელისო ჩაფიძის თქმით, ამაზე პოლიტსაბჭო მსჯელობს და გადაწყვეტილება, სავარაუდოდ, საარჩევნოდ იქნება მიღებული.
ელისო ჩაფიძე პარტია ”ქართული ოცნების” დატოვების შესახებ არმაზ ახვლედიანის გადაწყვეტილებასაც გამოეხმაურა და აღნიშნა, რომ ამაში ტრაგიკულს ვერაფერს ხედავს.
დეპუტატი არ ეთანხმება ახვლედიანს, რომ „ქართულმა ოცნებამ“ 2012 წლის დაპირებები არ შეასრულა.
„ინტერპრესნიუსი“